Ümumi depozitlərin yarısı əmanətlərin payına düşür

Cari ilin sentyabrın 1-nə ölkə banklarında yatırılan depozitlərin cəmi iyul ayı ilə müqayisədə 63,8 milyon manat azalaraq 4090,2 milyon manat təşkil edib. Bu barədə “İqtisadi forum” jurnalı Mərkəzi Banka istinadən xəbər verir.

2009-cu ilin yanvar ayı ilə müqayisədə avqustda depozit və əmanətlərin həcmi 18,5% azalıb. Yanvar ayında depozitlərin həcmi 5017,2 milyon manat olub.

Depozitlərin 1530,1 milyonu və ya 37,4%-i manatla, 2560 milyonu və ya 62,6%-i isə xarici valyuta ilə yerləşdirilib. Halbuki iyul ayında manatın payı 31,6%, xarici valyutanın payı isə 68,4% olub. Milli valyuta həm mütləq, həm də nisbi həcmdə artıb. Son bir ayda manat ilə qoyuluş 216,8 milyon artıb. Cəmi depozitlərdə manatın çəkisi 5,8% artıb. Xarici valyuta isə əksinə 280,8 milyon manat azalıb.

Sentyabrın 1-nə ölkə banklarına yerləşdirilən əmanətlərin həcmi 2024,1 milyon, depozitlərin həcmi isə 2066 milyon manat olub. Əhali əmanətlərinin həcmi ötən ayla müqayisədə 25 milyon manat artıb. Avqust ayında əhali əmanətlərin ümumi depozitlərdə payı iyul ayındakı 48%-dən 49,5%-ə yüksəlib. Depozitlərin həcmi isə 88,7 milyon manat azalıb.