Reyestrdə bələdiyyə ərazisində olan obyektlər, digər xidmət sahələri, torpaqların istifadə vəziyyətinə dair məlumatlar dəqiqliklə göstəriləcək

Yaxın vaxtlarda bələdiyyələrin reyestr xidməti yaradılacaq. Məqsəd bələdiyyələrin inzibati ərazilərinin sərhədlərini, orada fəaliyyət göstərən müəssisələrin siyahısını dəqiqləşdirməkdir. "İqtisadi forum" jurnalının məlumatına görə, Milli Məclisin regional siyasət komitəsinin sədr müavini, millət vəkili Tahir Rzayev Lent.az-a açıqlamasında belə deyib.

Onun sözlərinə görə, bələdiyyələrin mülkiyyətində olan torpaqların istifadə vəziyyəti də reyestrə daxil ediləcək. Həmçinin bələdiyyə ərazilərində sənaye, kənd təsərrüfatı və digər məqsədlər üçün nəzərdə tutulmuş torpaqlar, habelə torpaqların yararlılığına dair məlumatlar da toplanacaq.

Millət vəkili qeyd edib ki, bu məqsədlərə çatmaq üçün artıq inzibati ərazi dairələrinin qeydiyyatına başlanıb. Onun sözlərinə görə, bələdiyyələrin reyestr xidmətinin yaradılması prosesi başa çatandan sonra yerli özünüidarəetmə qurumları daha yaxşı fəaliyyət göstərə biləcəklər: “Bu işlər başa çatandan sonra bələdiyyələrin ərazi sərhədləri xəritələrdə daha dəqiq göstəriləcək. İndi bələdiyyələrin hamısının xəritələri var. Lakin bu xəritələrin bir çoxu dəqiq deyil. Sadəcə reyestrdə bələdiyyə ərazisində olan obyektlər, çaylar, göllər, dəmir yolları və digər xidmət sahələrinin hamısı dəqiqliklə göstəriləcək”.

Tahir Rzayevin sözlərinə görə, hazırda bələdiyyələrin ərazi sərhədlərinin müəyyənləşməsində, torpaqların istifadə vəziyyətinə dair məlumatların əldə olunmasında müəyyən nöqsanlar qalır. O, hətta bir çox bələdiyyələrin əraziləri dəqiq müəyyən edilmədiyindən mübahisələr yarandığını vurğulayıb: “Məsələn, Yevlaxla Mingəçevir, Salyanla Sabirabad, Şirvanda Hacıqabul arasında belə ərazi bölgüsü problemləri vardı. Amma bələdiyyələrin reyestr xidməti yaradılması ilə ərazi sərhədləri tam dəqiqləşir. Biz belə mübahisələrlə ilə bağlı araşdırma apardıq, məlum oldu ki, əvvəllər xəritələr çəkiləndə səhvlərə yol verilib, ərazilər dəqiq göstərilməyib. İndi bu məsələlər müvafiq qanunvericiliklə tənzimlənir”.

Millət vəkili qeyd edib ki, bələdiyyələrin reyestr xidmətinin yaradılması işində şəhər və kənd bələdiyyə assosiasiyaları da yaxından iştirak edir. Növbəti mərhələdə isə reyestrə daxil ediləcək məsələlərlə bağlı kənd şəhər və bələdiyyə assosiasiyaları, ictimai təşkilatlarla məsləhətləşmələrin aparılması nəzərdə tutulur.

Elxan SALAHOV