Növbəti ilin dövlət büdcəsinin gəlirlərinin 2,2 milyard manat azalması, büdcə kəsirinin isə 7 dəfə artaraq 1 milyard manatı ötməsi ölkə iqtisadiyyatının neftdən asılı olması haqda fikirləri bir daha təsdiq edir. Bu barədə İqtisadi Təşəbbüslərə Yardım İctimai Birliyinin ekspertləri “İqtisadi forum” jurnalına açıqlamasında bildirib.

2010-cu ilin büdcə gəlirləri 2009-cu illə müqayisədə 2,162 milyard manat azalaraq 10,015 milyard manata düşüb. Büdcə xərcləri isə 1,091 milyard azalaraq 11,264 milyard manata düşüb. 2009-cu ilin büdcə gəliri 12,177 milyard manat, xərci isə 12,355 milyard manat proqnozlşdırılıb.

2010-cu ilin dövlət büdcə kəsiri də əvvəlki illə müqayisədə 7 dəfə artaraq tarixində ilk dəfə 1,249 milyard manata çatıb. Halbuki 2009-cu ildə büdcə kəsiri 178 milyon manat olub.

Ekspertlərin hesablamalarına görə, büdcə gəlirlərinin yarısı Neft Fondunun transfertləri hesabına formalaşacaq. Bunun üçün Fondan dövlət büdcəsinə 4,915 milyard manat yönəldiləcək ki, bu da büdcə gəlirlərinin 49,1%-i qədərdir. 2009-cu ildə Neft fondununu transfertlərinin payı 40,4% təşkil edirdi.