2010-cu ilin büdcə xərcləri layihəsində bir sıra xərc maddələrinin, o cümlədən təhsil və səhiyyə xərclərinin azalmasına baxmayaraq dövlət xidməti və hüquq-mühafizə orqanlarına ayrılan vəsaitlər artırılıb. Bu barədə İqtisadi Təşəbbüslərə Yardım İctimai Birliyinin ekspertləri “İqtisadi forum” jurnalına açıqlamasında bildirib.  

Büdcə xərcləri növbəti ildə 11,264 milyard manat proqnozlaşdırılıb. 2009-cu illə müqayisədə büdcə xərcləri 8,8% və ya 1,091 milyard azalıb.

Büdcə xərclərində ən çox azalma sənaye, tikinti və faydalı qazıntılar bölməsində olub. 2010-cu ildə 3,564 milyard manat və ya büdcə xərclərinin 31,6%-i sənaye, tikinti və faydalı qazıntılara yönəldiləcək. 2009-cu illə müqayisədə bu xərclər 1,169 milyard manat və ya 25% azaldılıb. Sənaye, tikinti və faydalı qazıntılar bölməsinin büdcə xərclərində payı 38,3%-dən 31,6%-ə düşüb.

Ümumi dövlət xidməti xərcləri 1,042 milyard, məhkəmə hakimiyyəti, hüquq-mühafizə orqanları 0,707 milyard, müdafiə xərcləri 1,206 milyard manat proqnozlaşdırılıb. Bu xərc istiqamətləri üzrə artım müvafiq olaraq 65 milyon, 27,1 milyon və 0,3 milyon manat olub. Əvvəlki illə müqayisədə ümumi dövlət xidməti xərcləri 6,7%, məhkəmə hakimiyyəti, hüquq-mühafizə orqanları 4% artıb. Bununla da büdcə xərclərində ümumi dövlət xidməti xərclərinin payı 7,9%-dən 9,3%-ə, məhkəmə hakimiyyəti, hüquq-mühafizə orqanlarının payı 5,5%-dən 6,3%-ə, müdafiə xərclərinin payı isə 9,8%-dən 10,7%-ə qalxıb.

Təhsil xərcləri 1,277 milyard, səhiyyə xərcləri 0,479 milyard manat proqnozlaşdırılıb. Dövlət növbəti ildə 2009-cu illə müqayisədə təhsilə 76,3 milyon, səhiyyəyə isə 30,2 milyon manat az vəsait yönəldəcək. 2010-cu ildə təhsil xərcləri 5,6%, səhiyyə xərcləri isə 6% azaldılıb. Təhsil və səhiyyə xərclərinin həcmi mütləq həcmcə azalsa da, xüsusi çəkiləri təhsildə 11%-dən 11,3%-ə, səhiyyədə isə 4,1%-dən 4,3%-ə artıb.

Sosial müdafiə xərcləri 57,9 milyon artırılaraq 1,192 milyard manata çatdırılıb. Bu bölmənin büdcə xərclərində payı 9,2%-dən 10,6%-ə artıb.  Sosil müdafiə və sosial təminat xərclərində artım 5% olub.

Mədəniyyət, incəsənət xərcləri 172,8 milyon (azalma 0,9 milyon AZN), mənzil və kommunal təsərrüfatı xərcləri 201,2 milyon (azalma 9,7 milyon AZN), kənd təsərrüfatı, meşə təsərrüfatı, balıqçılıq və ovçuluq xərcləri 382,7 milyon (azalma 26,2 milyon AZN), nəqliyyat və rabitə xərcləri 77 milyon (azalma 2,1 milyon AZN), iqtisadi fəaliyyətlə bağlı xərclər isə 181,5 milyon (azalma 25,5 milyon AZN) manat proqnozlaşdırılıb.

Əsas bölməyə aid edilməyən xərclər 47,5 milyon artırılaraq 780,6 milyon manata çatdırılıb. Bu xərc maddəsi üzrə artım 6,5% olub.