2009-cu ilin büdcə gəlirlərində əsas mənbələri üzrə daxilolmalar kəsirlə icra olunacaq. Mənfəət vergisi üzrə daxilolmaların isə 2 dəfə azalması gözlənilir. “İqtisadi forum” jurnalının məlumatına görə,bu barədə 2010-cu ilin büdcə layihəsi zərfində qeyd olunur.

Layihəyə görə, 2009-cu ildə büdcə gəlirləri proqnozlaşdırılan 12,177 milyard manata qarşı 9,701 milyard manat və ya 79,7% icra olunacaq ki, bu da proqnozlaşdırılan məbləğdən 2,476 milyard manat azdır.

2009-cu ilin büdcəsində mənfəət vergisi üzrə daxilolmaların 53,1% icra olunması gözlənilir.  Belə ki, gözlənilən icraya görə, mənfəət vergisi üzrə daxilolmalar 2,214 milyarda qarşı 1,175 milyard manat olacaq..

Azalma digər vergilərdə də müşahidə edilir. Fiziki şəxslərin gəlir vergisi üzrə daxilolmalar 258 milyon manat və ya 28,7% az olacaq. Bu vergi növü üzrə daxilolmalar 642 milyon manat və ya 71,3% proqnozlaşdırılır.

Məlumata görə, hüquqi şəxslərdən əmlak vergisi üzrə daxilolmaların 70,4%, ƏDV-nin 78,7%, aksiz vergisinin isə 81,9% icra olunacağı gözlənilir. Bu vergi növləri üzrə proqnozdan kənarlaşma müvafiq olaraq 50 milyon, 488 milyon və 88,1 milyon manat olacaq. Gömrük rüsumlarının icrası 73,3% və ya 222 milyon manat gözlənilir.

Hüquqi şəxslərdən torpaq vergisi, sadələşdirilmiş vergi, yol vergisi üzrə daxilolmaların proqnozuna tam əməl olunması gözlənilir.

Xatırladaq ki, büdcə zərfinə görə, 2009-cu ildə büdcə gəlirləri proqnozlaşdırılan 12,177 milyard manata qarşı 9,701 milyard manat və ya 79,7% icra olunacaq ki, bu da proqnozlaşdırılan məbləğdən 2,476 milyard manat azdır.