2009-cu ilin 9 ayında dövlət büdcəsinə 7235,1 milyon manat daxil olub ki, bu da proqnozdan 635 milyon manat azdır. Hesabar ilində büdcə gəlirləri 91,9% icra olunub. Bu barədə “İqtisadi forum” jurnalı Maliyyə Nazirliyinə istinadən məlumat verir.

Yanvar-sentyabr aylarında dövləti büdcəsinin daxilolmaları 7870,1 milyonluq proqnoza qarşı 7235,1 milyon manat olub ki, bu da ötən ilin müvafiq dövrü ilə müqayisədə 3,6% və ya 271,4 milyon manat azdır.

Büdcə daxilolmalarının 35,5%-i Vergilər Nazirliyinin, 12,1%-i Gömrük Komitəsinin, 50,9%-i Dövlət Neft Fondunun, 1,5%-i isə sair mənbələrin payına düşür.

Vergilər Nazirliyi xətti ilə 2567,8 milyon manat vəsait köçürüb ki, bu da proqnozdan 16,5% və ya 506,2 milyon manat azdır. Ötən ilin müvafiq dövrü ilə müqayisədə vergi daxilolmaları 1778,2 milyon manat və ya 40,9% azdır. Vergi daxilolmalarının 25%-i və ya 641,4 milyon manatı Dövlət Neft Şirkətinin, 8,2% və ya 210,8 milyon manatı isə ABƏŞ-in mənfəət vergisinin payına düşür. Bu da uyğun olaraq ötən ilin yanvar-sentyabr ayları ilə müqayisədə 25,5% və 88,2% azdır.

Vergi daxilolmalarının 66,8%-ni və ya 1715,6 milyon manatını qeyri-neft gəlirləri təşkil edir ki, bu da proqnoza nisbətən 338,4 milyon manat və ya 16,5% azdır.

Dövlət Gömrük Komitəsinin xətti ilə 875,1 milyon manat vəsait daxil olub. Bu proqnozdan 8,3% və ya 78,9 milyon manat az, 2008-ci ilin müvafiq dövrü ilə müqayisədə isə 29,6 milyon manat və ya 3,5 faiz çoxdur.

Əmlak Məsələləri Dövlət Komitəsi tərəfindən dövlət əmlakının icarəyə verilməsindən icarə haqqı şəklində büdcəyə 3,8 milyon manat və ya proqnozdan 8,6% çox vəsait daxil olub.

Dövlət büdcəsindən maliyyələşən təşkilatların büdcədənkənar daxilolmaları üzrə 106,1 milyon manat proqnoza qarşı büdcəyə 71,7 milyon manat vəsait daxil olmaqla icra 67,6 faiz təşkil edib.