2009-cu ilin 9 ayında dövlət büdcəsindən 6456,9 milyon manat xərclənib ki, bu da proqnozlaşdırılan məbləğdən 1437,2 milyon manat azdır. Ümumilikdə xərc maddələrinin icrasında 18,2% kəsir olub. Bu barədə “İqtisadi forum” jurnalı Maliyyə Nazirliyinə istinadən məlumat verir.

İlin əvvəlində 2009-cu ilin yanvar-sentyabr ayları üçün büdcə xərcləri 7894,1 milyon manat proqnozlaşdırılmışdı.

9 ayda sosial müdafiə və sosial təminat istisna olmaqla, dövlət büdcəsindən maliyyələşdirilən bütün istiqamətlərin icrasında kəsir yaranıb. Ümumi dövlət xidmətləri 83%, müdafiə 80,3%, məhkəmə hakimiyyəti, hüquq-mühafizə və prokurorluq 80,2% icra olunub. Ümumi dövlət xidmətlərinə 517,8 milyon, müdafiəyə 483,7 milyon, məhkəmə hakimiyyəti, hüquq-mühafizə və prokurorluğa 420,8 milyon manat həcmində vəsait ayrılıb. Halbuki bu istiqamətdə müvafiq olaraq 624,2 milyon, 598,9 milyon, 524,7 milyon manat proqnozlaşdırılıb.

Hesabat dövründə sosial müdafiə və sosial təminat xərcləri 100% icra olunub.

Təhsilin və səhiyyənin maliyyələşməsinə uyğun olaraq 9,3% və 14,6% az vəsait ayrılıb. Təhsil sferasına 864,5 milyonluq proqnoza qarşı 783,9 milyon, səhiyyədə isə 301,1 milyona qarşı 257,1 milyon manat xərclənib.

Cari ilin doqquz ayında sosialyönümlü tədbirlərin maliyyələşdirilməsinə dövlət büdcəsi xərclərinin 30,1%-i və ya 1941,5 mln. manat yönəldilib. Bu da ötən ilin eyni dövrü ilə müqayisədə 426,5 milyon manat və ya 28,2% çoxdur.

Mədəniyyət, incəsənət, informasiya, bədən tərbiyəsi və digər kateqoriyalara aid edilməyən sahədə fəaliyyət 92,9%, kənd təsərrüfatı, meşə təsərrüfatı, balıqçılıq, ovçuluq və ətraf münitin mühafizəsi 86,4%, mənzil və kommunal təsərrüfatı 92,9%, sənaye, tikinti və faydalı qazıntılar 73,7%, nəqliyyat və rabitə 85,4% icra olunub. Bu istiqamətlərdə uyğun olaraq 99,5 milyon (proqnoz 111 milyon), 234,2 milyon (proq.271,2 milyon), 125,2 milyon (proq. 134,7 milyon), 2229,6 milyon (proq. 3024,5 milyon) və 47,9 milyon (proq. 56,1 milyon) manat həcmində vəsait yönəldilib.