Gələn il dövlət büdcəsindən Bakı metropoliteninə 9,1 milyon manat məbləğində subsidiyanın ayrılması proqnozlaşdırılır ki, bu da 2009-cu ilin proqnozundan 3,6 dəfə, gözlənilən icrasından isə 3 dəfə azdır. Bu barədə “İqtisadi forum” jurnalı bu günlərdə parlamentə müzakirəyə çıxarılacaq 2010-cu ilin büdcə layihəsinə istinadən xəbər verir.

Milli Məclis 2010-cu ilin büdcə layihəsini olduğu kimi qəbul edərsə, növbəti il dövlət büdcəsindən Bakı Metropoliteninə 9,1 milyon manat məbləğində subsidiya ayrılacaq. 2009-cu ilin proqnozunda bu istiqamətdə 33,1 milyon manatın ayrılması nəzərdə tutulmuşdu. Ancaq ilin sonuna həmin vəsait ixtisar edilərək 26,84 milyon manata kimi azaldıldı. Bunu kompensasiya etmək üçün hökumət il sona çatmamış gediş haqqını qaldırdı. 

Tarif Şurasının qərarı ilə oktyabrın 1-dən gediş haqqı 3 dəfə artırılaraq 5 qəpikdən 15 qəpiyə qaldırıldı. Proqnoza görə, artım nəticəsində Bakı Metropoliteninin hesabına ildə əlavə 20 milyon manat vəsaitin daxil olacağı gözlənilir. Bakı Metropoliteninin rəisi Tağı Əhmədov “Mediaforum”a açıqlamasında metro nəqliyyatında bir sərnişinin daşınmasının 49,2 qəpiyə başa gəldiyini vurğulayaraq gediş haqqının ən azı 20 qəpik olmalı olduğunu bildirmişdi.

Növbəti ili üçün metropolitenə ayrılacaq subsidiyanın məbləği 2009-cu ilin gözlənilən icrası ilə müqayisədə 17,74 milyon manat azaldılıb.