2009-cu ilin üçüncü rübündə əlavə olaraq 2 bank olmayan kredit təşkilatı lisenziya alıb. Bununla da bank əməliyyatları aparmaq üçün lisenziya almış bank olmayan kredit təşkilatlarının sayı 98-ə çatıb. “İqtisadi forum” jurnalının Mərkəzi Bankın statistik məlumatlarına istinadən verdiyi məlumata görə, bu müddətdə ölkə üzrə kredit təşkilatların sayı 144-ə yüksəlib.

Oktyabrın 1-i tarixinə kredit təşkilatlarının 46-nı banklar təşkil edib. Azərbaycan Beynəlxalq Bankı istisna olmaqla yerdə qalan 45 bank özəl mülkiyyətə malikdir. Bankların 23-ü xarici kapitalın iştirakı işləyir. 7 bankın nizamnamə kapitalının 50%-dən 100%-nə qədərini, 14 bankın nizamnamə kapitalının isə 50%-dən az olan hissəsini xarici kapital təşkil edir. Xarici bankların yerli filiallarının sayı 2-yə bərabərdir.

2009-cu ilin 9 ayında fəaliyyətdə olan bankların yerli filiallarının sayı 618-ə bərabər olub. Bunların 38-i dövlət, 580-i isə özəl bankların payına düşür. İkinci rüblə müqayisədə üçüncü rübdə özəl bankların filialları 5 ədəd artsa da, dövlət bankında artım olmayıb. Bununla da yerli filialları olan bankların sayı 38-dən 40-a yüksəlib.

Üçüncü rübdə 3 bank şöbəsi bağlanıb. İkinci rüblə müqayisədə onların sayı 106-dan 103-ə düşüb.

Bankların xaricdə fəaliyyət göstərən strukturlarının sayı 9-a bərabərdir. Bunlardan 6-sı nümayəndəlik, 2-si törəmə bank, digəri isə filialdır.

İlin əvvəlindən ləğv etmə mərhələsindən olan 3 bankdan artıq 1-i tam ləğv edilib.

Bank olmayan 98 kredit təşkilatının 79-nu kredit ittifaqları, 18-ni beynəlxalq humanitar təşkilatlar tərəfindən maliyyələşdirilən təşkilatlar, 1-ni isə digər bank olmayan təşkilatlar təşkil edir.