Yanvar-oktyabr ayları ərzində dövlət bankı tərəfindən iqtisadiyyata 3 milyard 764,9 milyon manat, özəl banklar tərəfindən 4 milyard 21,9 milyon manat, qeyri-bank kredit təşkilatları tərəfindən isə 177 milyon manat həcmində kredit qoyulub.

Əvvəlki ayla müqayisədə oktyabrda dövlət bankı tərəfindən ölkə iqtisadiyyatına yatırım 59,8 milyon manat artıb. Ancaq buna baxmayaraq ümumi kreditlərdə dövlətin payı 47,6%-dən 47,3%-ə düşüb.

Kredit qoyuluşlarında özəl banklarının töhfəsi həm mütləq həcm, həm xüsusi çəki baxımından artıb. Özəl bankların yatırımı oktyabrda 128,2 milyon manat artıb. Cəmi kreditlərdə payı isə 50%-dən 50,5%-ə yüksəlib.

Xarici kapitallı banklar ölkə iqtisadiyyatına 2 milyard 40,1 milyon (25,6%), 100%-li xarici kapitalla fəaliyyət göstərən banklar isə 372,9 milyon manat (4,7%) həcmində kredit yönəldiblər.

Qeyri-bank kredit təşkilatlarının kredit qoyuluşu sentyabr ayı ilə müqayisədə 5 milyon azalaraq 177 milyon manata düşüb. Bununla bu təşkilatların kredit qoyuluşunda payı 2,3%-dən 2,2%-ə düşüb. Mart ayından başlayaraq qeyri-bank kredit təşkilatlarının ümumi kreditlərdə payı azalmaqda davam edir. Bu təşkilatlar 2009-cu ildə ən yüksək xüsusi çəkiyə (2,9%) martda malik olub.