Oktyabrda əhali tərəfindən ölkə banklarına yatırılan əmanətlərin ümumi həcmi artsa da, xarici valyuta üzrə əmanətlərin həcmində azalma müşahidə edilib. Bu barədə “İqtisadi forum” jurnalı Mərkəzi Bankın statistik məlumatlarına əsasən məlumat verir.

2009-cu ilin noyabr ayının 1-i tarixinə əmanətlərin ümumi həcmi 2 milyard 125,7 milyon manat olub. Bu ötən ilin müvafiq dövrü ilə müqayisədə 18,4% çoxdur. Son 10 ayda isə əmanətlərin həcmi 220,5 milyon manat vəya 11,6% azalıb.

Oktyabrda əhali əmanətlərinin həcmi əvvəlki ayla müqayisədə 4,9 milyon manat artıb. Belə ki, sentyabr ayında əhali tərəfindən ölkə banklarına yerləşdirilən əmanətlərin həcmi 2120,8 milyon manat olduğu halda, oktyabrda artaraq 2125,7 milyon manata çatıb.

Əmanətlərin 825 milyonu manatla, 1300,7 milyonu isə xarici valyutada yatırılıb. Sentyabr ayı ilə müqayisədə əhali milli valyuta ilə əmanət qoyuluşu 18,9 milyon manat artıb. Bununla da manatın ümumi əmanətlərdə xüsusi çəkisi sentyabr ayındakı 38%-dən oktyabrda 38,8%-ə qalxıb.

Manatın strukturuna diqqət yetirdikdə məlum olur ki, bu artım müddətli əmanətlər hesabına baş verib. Belə ki, müddətli əmanətlərin həcmi 25,2 milyon manat artaraq 515,8 milyondan 541 milyon manata yüksəlib. Halbuki tələb olunanadək qoyulan əmanətlər 6,3 milyon azalıb.

Oktyabrda xarici valyuta ilə əmanət qoyuluşu sentyabr ayı ilə müqayisədə 14 milyon manat azalıb. Bu müddətdə xarici valyuta əmanətləri 1 milyard 314,7 milyondan 1 milyard 300,7 milyon manata düşüb. Müddətli əmanətlərin həcmi 15,8 milyon azalaraq 1 milyard 153,7 milyon manata düşüb. Tələb olunanadək qoyulan əmanətlərin həcmi isə 1,8 milyon manat artıb.