2009-cu ilin 9 ayında yerli büdcələrə bələdiyyə torpaqlarının özəlləşdirilməsindən 3,7 milyon manat həcmində vəsait daxil olub ki, bu da ötən ilin müvafiq dövrü ilə müqayisədə 5 dəfə azdır. “İqtisadi forum” jurnalının Dövlət Statistika Komitəsinə istinadən verdiyi məlumata görə, 2008-ci ilin eyni dövründə bu mənbədən 18,6 milyon manat vəsait daxil olub.

2009-cu ilin yanvar-sentyabr aylarında bələdiyyə orqanlarının büdcəsinin 23,6%-i torpaq satışından əldə olunan gəlirlər hesabına formalaşıb. Halbuki ötən ilin müvafiq dövründə bu göstərici 57% təşkil edib.

2009-cu ilin proqnozunda torpaq satışından daxilolmalar 19,2 milyon manat nəzərdə tutulsa da, 9 ayın sonunda cəmisi 19,1% icra olunub.

9 ayda ölkə üzrə satılan bələdiyyə torpaqlarından daxil olan vəsaitin 1 milyon manatı və ya 27%-i Abşeron bələdiyyələrinin payına düşüb. 

Şirvan və Mingəçevir şəhər bələdiyyələrinin büdcə gəlirlərinin əsas hissəsi torpaq satışından əldə olunan gəlirlər təşkil edib. Şirvan bələdiyyəsi büdcəsinin 89,4%-i, Mingəçevir şəhər bələdiyyəsi büdcəsinin isə 85,7%-i bu mənbədən daxil olub. Bu bələdiyyələrdə torpaq satışından uyğun olaraq 484,5 min manat və 125,7 min manat daxil olub.

Sumqayıt bələdiyyələrinin büdcə gəlirlərinin cəmisi 2,2%-i torpağın özəlləşdirilməsi hesabına formalaşıb. Bu il satışdan büdcəyə 7 min manat məbləğində vəsait daxil olub.

Bu mənbə üzrə ən az daxilolma Gədəbəy və Ucar rayonu bələdiyyələrinin payına düşüb. Gədəbəydə torpaq satışından 400 manat, Ucarda isə cəmisi 100 manat gəlir əldə edilib.

Gəncə, Daşkəsən, Lerik rayonlarında isə yanvar-sentyabr aylarında torpaq satışı həyata keçirməyib.

Məlumat üçün bildirək ki, 2009-cu ilin yanvar-sentyabr aylarında bələdiyyə orqanlarının büdcə gəlirləri 48,3 milyon manatlıq proqnoza qarşı 15,5 milyon manat təşkil edib. Bu müddətdə büdcə gəlirlərinin icrası 32% olub. Ötən ilin müvafiq dövrü ilə müqayisədə büdcə gəlirləri 52,4% azalıb.