“İqtisadi forum” jurnalının məlumatına görə, ölkə banklarında illik faiz dərəcəsi 15 faizədək olan bütün əmanətlər sığortalanacaq. Bu isə o deməkdir ki, 2009-cu ilin 1 yanvar tarixindən etibarən Fonda üzv olan banklarda ən çoxu 15 faiz dərəcəsi ilə yerləşdirmiş əmanətlər qorunan əmanətlər hesab olunur və Fond tərəfindən sığortalanır.

Məlumat üçün bildirək ki, yeni qayda Milli Məclisin “Əmanətlərin sığortalanması haqqında” Azərbaycan Respublikası Qanununa etdiyi 08 may 2009-cu il tarixli dəyişiklikdən sonra  qüvvəyə minib və yanvarın 1-dən etibarən banklarda yerləşdirilmiş bütün əmanətlərə şamil edilir. Dəyişikliyə əsasən əhalinin banklardakı əmanətlərinin sığorta olunan hissəsi 30 min manatadək qaldırılıb. Bu isə o deməkdir ki, əmanətçinin müştərisi olduğu bankda problem yaranarsa, illik 15 faizlə qoyulan əmanətin 30 min manatı və faizləri fond tərəfindən geri qaytarılacaq. Əmanətin illik faiz dərəcəsi 15 faizdən yuxarı olduğu təqdirdə isə həmin bu əmanətlər fond tərəfindən sığortalanmayacaq.

Məlumat üçün bildirək ki, əmanətçilər əmanətlərin sığortalanması üçün heç bir ödəniş etmirlər. Sığorta haqları yalnız banklar tərəfindən ödənilir