Əvvəlki illə müqayisədə azalmağına rəğmən İtaliya 2009-cu ildə də Azərbaycanın əsas xarici ticarət tərəfdaşı olub. Ötən il aparılmış ixrac əməliyyatlarının 25,77%-i bu dövlətin payına düşüb. Halbuki 2008-ci ildə İtaliyanın payı ümumi ixracın 40,25%-ni  təşkil edib.

“İqtisadi forum” jurnalının Dövlət Gömrük Komitəsinə istinadən verdiyi məlumata görə, İtaliya göndərilən malların həcmi $3,8 milyard olub. 2008-ci ildə bu məbləğ $19,2 milyarda bərabər olub.

ABŞ-ın ötən il ixracda payı azalsa da, Azərbaycanın ikinci böyük ixrac tərəfdaşı olub. 2008-ci ildə bu ölkə Rusiyadan sonra üçüncü olub.

İxracda ikinci böyük paya malik ABŞ-ın payı 12,59%-dən 11,88%-ə düşüb. Ötən il okeanın o biri tayına $1,75 milyardlıq mal göndərilib.

Fransa isə 5-ci yerdən 3-cü yerə yüksəlib və İsraili növbəti pilləyə salıb. Bu ölkənin payı 4,86%-dən 9,02%-ə yüksəlib. İsrailin payı 7,55%-dən 8,41%-ə yüksəlsə də dördüncü xüsusi çəkiyə malik olub.

İxrac əməliyyatlarında Rusiya 5,07%, Tayvan 4,63%, İndoneziya 4,49%, Kanada 4% paya malik olub. Ümumi ixracda qonşu Gürcüstanın payı 2,69%, Malayziyanın payı isə 2,64% təşkil edib.

İdxalda isə 2008-ci ildə olduğu kimi ən böyük çəkiyə malik dövlət Rusiya olub. Əvvəlki illə müqayisədə ötən il şimal qonşumuzdan gətirilən malların həcmi azalsa da ümumi idxalda payı 17,5%-dən 18,83%-ə artıb. Rusiyadan idxal olunan məhsulların həcmi $1,35 milyarddan $1,07 milyarda düşüb.

Ümumi idxalda Türkiyə 11,27%, Almaniya 8,36%, Ukrayna 7,92%, Çin 6,68%, Britaniya 5,39%, ABŞ 3,72%, Finlandiya 3,43%, Yaponiya 3,36%, Qazaxıstan isə 2,79% paya malik olub.