2009-cu ildə xarici ticarət əməliyyatlarında yük daşınmaları əvvəlki illə müqayisədə 2,3 dəfə azalaraq 41,4 milyon ton təşkil edib. “İqtisadi forum” jurnalının Dövlət Gömrük Komitəsinə istinadən verdiyi məlumata görə, 2008-ci ildə müxtəlif növ nəqliyyat vasitələri ilə yük daşınmaların həcmi 93,4 milyon ton olub.

Yük daşınmalarının 82%-i ixracın, 18%-i isə idxalın payına düşüb. Bu müddətdə 34 milyon ton həcmində yük ölkə xaricinə, 7,4 milyon ton isə ölkəyə daxilinə daşınıb.

İxrac əməliyyatlarının 83,4%-i və ya 28,3 milyon tonu boru kəməri ilə nəql edilib. Xarici ölkələrə dənizlə 286,8 min ton, dəmiryolu ilə 3220,5 min ton, avtomobillə 458,9 min ton və hava ilə 1668,3 min ton həcmində yük göndərilib. Bu nəqliyyat növlərinin ümumi ixrac daşınmalarında payı uyğun olaraq 0,8%, 9,5%, 1,4% və 4,9% təşkil edib.

İdxal əməliyyatlarında daşınmanın əsas yükü həmişə olduğu kimi dəmiryolu nəqliyyatının payına düşüb. Ölkəyə gətirilən yüklərin 73,6%-i və ya 5456 min tonu dəmiryolu vasitəsilə daşınıb. İdxal üzrə yük daşınmalarının 371,7 min tonu dəniz, 1521,3 min tonu avtomobil, 22,7 min tonu isə hava nəqliyyatı vasitəsilə həyata keçirilib. Bu nəqliyyat növlərinin ümumi idxal daşınmalarında payı uyğun olaraq 5%, 20,5% və 0,3% təşkil edib.

Komitənin məlumatına görə, daşınmalarda nəqliyyat vasitələrindən istifadənin vəziyyətinin təhlili yalnız yük gömrük bəyannamələri əsasında aparılıb. Hesabat dövründə gömrük orqanlarında 206486 ədəd yük gömrük bəyannaməsi rəsmiləşdirilib.

Ölkə ərazisindən keçirilən tranzit yüklərin həcmində isə artım müşahidə edilib. Ötən il tranzit olaraq ölkə ərazisindən 6681,7 min ton yük keçirilib ki, bu da 2008-ci illə müqayisədə 86,2 min ton çoxdur.  Tranzit yüklər əsasən İsveçrə (2114,8 min ton), İtaliya (1433,2 min ton), Bermud adaları (1422,9 min ton), Gürcüstan (540,9 min ton), Tacikistan (338,7 min ton), Türkmənistan (302,7 min ton), Rusiya (142,0 min ton), Türkiyə (100,2 min ton) və İran (139,8 min ton) kimi ölkələrə göndərilib.