“Cari ilin II rübündə dünyaın ən böyük şəkər istehsalçısı olan Braziliya tərəfdən şəkər təklifi minimal olacaq”, - "ED&F Man Holdings Ltd." treyder şirkətinin eksperti Şon Difli qeyd edir. Onun fikrincə, III rübə kimi kəskin şəkər qıtlığı olmayacaq.

Bununla yanaşı Hindistan, Çin, İndoneziya, Pakistan, Misir və Rusiya daxili qiymətləri tənzimləmək üçün xarici bazardan şəkər almaq niyyətindədir.
 
Şon Difli hesab edir ki, şəkərin dünya ehtiyatı ilə onun istehlakı arasında nisbət II rübdə son 20 ildə ən aşağı düşəcək. 

"Kingsman SA" broker şirkətinin məlumatına görə, dünyada ən böyük şəkər istehlakçısı olan Hindistan 7 milyon ton həcmində olan kəsiri örtmək üçün bu mövsüm 2,5-3 milyon ton şəkər almaq niyyətindədir. “Üçüncü ən böyük istehlakçı olan Pakistan isə iyun ayında 1,25 milyon ton həcmində şəkər almağı planlaşdırır” – deyə şirkət bildirir.

Şəkər istehlakından ancaq Hindistandan geri qalan Çində şəkər çuğundurunun məhsuldarlığını azalda biləcək quraqlıq və soyuq hava barədə xəbərdən sonra 3,3 milyon ton həcmində kəsir gözlənilir.

"Kingsman SA" broker şirkətinin direktoru Conatan Kinqsmanın sözlərinə görə, 2009-cu ilin oktyabr ayındakı 8,32 milyon tonla müqayisədə 30 aprel 2010-cu ildə bitən mövsümdə dünya üzrə şəkər qıtlığı 11,92 milyon ton ola bilər.

"Czarnikow Group Ltd." ticarət evinin proqnozuna görə, 2009/10 sezonunda dünya üzrə şəkər qıtlığı 13,5 milyon ton olacaq.