BVF-nin qızıl ehtiyatının bir hissəsinin satılması üzrə ikinci mərhələyə start verməsi xəbəri dünya bazarında qızılın qiyməti təsir edib. Xəbərin yayılması nəticəsində əmtəə bazarlarında nəcib metalın unsiyası $10,65 ucuzlaşaraq $1103,15-ə enib.

“İqtisadi forum” jurnalının “The Wall Street Journal” qəzetinə istinadən verdiyi məlumata görə, BVF 191,3 ton qızılın açıq bazarda satışa çıxarılması barədə fevralın 17-də açıqlama verib. Açıqlamadan sonra Asiya bazarlarında qızılın unsiyası $10,65 ucuzlaşaraq $1103,15-ə enib.

Bloomberg agentliyinin məlumatına görə, bu dövrdə Nyu-York birjasında qızıl 1,3% ucuzlaşıb və hətta bir müddət unsiyasının qiyməti $1105,3 təşkil edib.

Xatırladaq ki, 2009-cu ilin sentyabr ayında BVF-nin İcraiyyə Şurası 403,3 ton qızılın satılması barədə qərar qəbul etmişdi. Fond qiymətli metalın ilk növbədə, ölkələrin mərkəzi banklarına təklif olunacağını bildirmişdi. Elə bu səbəbdən də satışın ilk mərhələsində Fond mərkəzi banklarla sövdələşmə aparıb. Ötən il ərzində ümumilikdə 212 ton qızıl satılıb, 191,3 ton qızıla isə ikinci mərhələyə qalmışdı. İkinci mərhələdə qızıl satışı açıq bazarda həyata keçiriləcək. 

Üç ölkənin mərkəzi bankına satılmış qızıldan Fond təxminən $7,9 milyard gəlir əldə edib. Bu nəcib metalın satışının ilk partiyası 19-30 oktyabr tarixində həyata keçirilib. Həmin dövrdə Hindistanın Mərkəzi Bankı 200 ton həcmində qızıl alıb. Bu satışdan Fond $6,7 milyard gəlir əldə edib. Qızılın ikinci müştərisi Mavrikiya Respublikası olub. Noyabrın 16-da imzalanan müqavilə nəticəsində ölkənin Mərkəzi Bankı 2 ton həcmində qızıl alıb. Fondun bu sövdələşmədən gəliri $71,7 milyon təşkil edib. Üçüncü alıcı - Şri-Lanka noyabrın 23-də 10 ton qızıl alıb və Fonda $375 milyon ödəyib.

Satışa çıxarılan 191,3 ton qızılın həcmi $6,9 milyard məbləğində qiymətləndirilir.

Məlumat üçün bildirək ki, BVF 3217 ton qızıl ehtiyatına malikdir və ABŞ və Almaniyadan sonra dünyada qızıl ehtiyatına görə 3-cü yeri tutur. Satışa çıxarılmış qızıl Fondun bütün qızıl ehtiyatının 1/8 hissəsini təşkil edir.