Cari ilin avqustun 1-nə ölkə iqtisadiyyatına yönəldilən cəmi kredit qoyuluşları 7229,2 milyon manat təşkil edib ki, bu da ötən ilin müvafiq dövrünə nisbətən 13,6% çoxdur. Kredit qoyuluşlarının 262,4 milyon manatı vaxtı keçmiş kreditlərin payına düşüb. Bu barədə “İqtisadi forum” jurnalı Mərkəzi Banka istinadən xəbər verir.

Bankdan bildiriblər ki, 2009-cu il avqustun 1-nə kreditlərin 2116,6 mln. manatı (29,3%) qısamüddətli, 5112,6 mln. manatı (70,7%) isə uzunmüddətli olub. Qısamüddətli kreditlərin 6,7%i, uzunmüddətli kreditlərin isə 2,4%-i vaxtı keçmiş kreditlərin payına düşür.

Dövlət bankı tərəfindən iqtisadiyyata 3298,8 mln. manat (45,6%), özəl banklar tərəfindən 3748,5 mln. manat (51,9%), qeyri-bank kredit təşkilatları tərəfindən isə 182,0 mln. manat (2,5%) kredit qoyulub.

Xarici kapitalın iştirakı ilə yaradılan banklar tərəfindən Azərbaycan iqtisadiyyatına 1974,7 mln. manat kredit yönəldilib ki, bunun da ümumi kredit qoyuluşlarında xüsusi çəkisi 27,3%-ə bərabərdir. 100%-li xarici kapitalla fəaliyyət göstərən banklar isə 350,7 mln. manat (4,9%) kredit vermiblər.

Kreditlərin 3856,5 mln. manatı və ya 53,3%-i manatla, 3372,7 mln. manatı və ya 46,7%-i xarici valyuta ilə verilib.