Yanvarda neft ixracının artması İtaliyanın cəmi ixracda payının artmasını şərtləndirib. Ötən ilin müvafiq dövrü ilə müqayisədə bu il İtaliyanın ixracda xüsusi çəkisi 34,95%-dən 42,85%-ə yüksəlib. “İqtisadi forum” jurnalının Dövlət Gömrük Komitəsinə istinadən verdiyi məlumata görə, İtaliyaya ixracın həcmi ay ərzində $611,9 milyon təşkil edib. Halbuki 2009-ci ilin ilk ayında bu məbləğ $238,2 milyona bərabər olub.

Yanvarda Azərbaycanın ikinci böyük ixrac tərəfdaşı İndoneziya olub. 2009-cu ilin müvafiq dövründə ixrac tərəfdaşlarının ilk onluğa düşə bilməyən İndoneziyanın payı bu il artaraq 9,69%-ə yüksəlib. İndoneziyaya $138,4 milyon məbləğində mal göndərilib.

Ötən il Azərbaycanın ikinci böyük ixrac tərəfdaşı ola ABŞ bu il 6-cı olub. Birləşmiş Ştatlara $72,7 milyonluq mal göndərilib. Bu müddətdə ABŞ-ın payı 2 dəfə azalaraq 11,36%-dən 5,09%-ə düşüb.

Fransaya $120,26 milyon, İsrailə $77,05 milyon, Kanadaya $77,05 milyon, Tayvana 71,31 milyon, Tailanda $53,57 milyonluq mal göndərilib.  Bu ölkələrin ümumi ixracda payı müvafiq olaraq 8,42%, 5,4%, 5,4%, 4,99%, 3,75% təşkil edib.

İdxalda isə ötən il olduğu kimi bu il də Rusiya ən böyük çəkiyə malik olub. Ötən ilin müvafiq dövrü ilə müqayisədə yanvarda Rusiyadan gətirilən malların həcmi azalsa da ümumi idxalda payı artıb. 2009-cu ilin yanvarında Rusiyadan idxalın həcmi $82,7 milyon olduğu halda bu il azalaraq $74,7 milyona düşüb. Bu ölkənin payı isə əksinə, 15,9%-dən 20,53%-ə yüksəlib.

Ümumi idxalda Türkiyə 11%, Almaniya 8,68%, Ukrayna 6,88%, Çin 6,71%, Fransa 5,52%, Qazaxıstan 3,96%, Braziliya 2,94%, ABŞ 2,7%, Britaniya 2,55% paya malik olub.