Ötən il dollardan imtina edən ölkələr artıq Amerika valyutasına tərəf üz tutmalı olublar. Bu ölkələrin bir çoxu valyuta ehtiyatlarında dolların payını artırmaqda davam edirlər. Avrozonada, xüsusilə də Yunanıstanda yaşanan maliyyə problemləri Avropa valyutasının dəyərini zərbə altında qoyub.

“İqtisadi forum” jurnalının BVF-yə istinadən verdiyi məlumata görə, 2009-cu ilin IV rübündə 33 inkişaf etmiş və 107 inkişaf etməkdə olan ölkələrin beynəlxalq ehtiyatları əvvəlki rüblə müqayisədə 2,86% artıb. Bu müddətdə beynəlxalq ehtiyatlarının həcmi $7,861 trilyondan $8,087 trilyona yüksəlib. Fond hesablamalarında IV rübün sonuna olan mübadilə kursunu götürüb. Həmin dövrdə 0,6942 avro 1 dollara bərabər olub.

Son zamanlar ən yüksək artım dollarla yerləşdirilmiş ehiyatların həcmində baş verib. Mütləq həcmdə oktyabr-dekabr aylarında ehtiyatların həcmi 4% artaraq $2,729 trilyondan $2,837 trilyona yüksəlib. Bu müddətdə avro ehtiyatları 1,5% artıb. Avroda yerləşdirilmiş ehtiyatların həcmi $1,231 trilyondan $1,25 trilyona yüksəlib. Qlobal ehtiyatların ümumi strukturunda dolların payı 61,5%-dən 62,1%-ə yüksəlib. Avronun payı isə 27,8%-dən 27,4%-ə düşüb.

Ehtiyatların dollarla olan hissəsi ötən ilin II rübündən etibarən artmağa başlayıb. Ona qədər isə 2 rüb ərzində dolların payının azalması qeydə alınıb.
 
BVF ekspertlərinin fikrincə, 2010-cu ilin I rübündə qlobal valyuta ehtiyatlarında dolların payının artması tendensiyası saxlanılacaq. Ekspertlərə görə, buna səbəb avro və funt sterlinqin dollara nisbətən ucuzlaşmasıdır.