Yan Mikallef: "Bu, bizim Azərbaycan hakimiyyətinə verdiyimiz güclü bir mesajdır..."

Avropa Şurası Yerli və Regional Hakimiyyətlər Konqresi sədrinin səlahiyyətlərinin icraçısı Yan Mikallef sentyabrın 10-da nümayəndə heyəti ilə birlikdə Bakıya gəlib.

Görüşlərdən qabaq Y.Mikallef AzadlıqRadiosuna müsahibə verib:

- Cənab Mikallef, siz Azərbaycanda bələdiyyə seçkilərindən qabaqkı vəziyyəti necə qiymətləndirirsiz? Sizcə, ölkədə azad və ədalətli seçkilər üçün şərait varmı?

- Bakıya budəfəki səfərimizin də məqsədi monitorinq aparmaqdır. Aydınlaşdırmağa çalışacağıq ki, ötən monitorinqdən keçən müddət ərzində hökumət hansısa müsbət dəyişikliyə nail olub, ya yox.

- Konqres bələdiyyə seçkilərini müşahidə də edəcək, elə deyilmi?

- Bəli, artıq bu barədə hazırlıq başlayıb. Bizim nümayəndə heyətinin tərkibi barədə qərar ya sentyabrın 21-də, ya da ki, oktyabrın 15-də veriləcək. Bu zaman həm də Azərbaycandakı müşahidələrimizə əsaslanacağıq.

- Amma əlbəttə ki, Azərbaycanda bələdiyyələrin vəziyyəti haqda səfərə qədər də təsəvvürünüz vardı...

- Hökumətə çağırışımız budur ki, yerli hakimiyyətlərə daha çox muxtariyyət və maliyyə ayırsın. Bu, bizim Azərbaycan rəsmiləri ilə dialoqlarda ötürmək istədiyimiz əsas mesajdır. İnanırıq ki, mövcud vəziyyətlə bağlı öz narahatlığımızı bildirməkdənsə, hakimiyyətlə dialoqu davam etdirməyə cəhd daha faydalı olar. Ona görə qərara gəldim ki, Azərbaycan rəsmilərinə dialoq üçün müraciət edim, onlarla üz-üzə danışım. Məqsədim onlara bunu izah etməkdir - yerli səviyyədə demokratiya bütün ölkədəki demokratiyanı şərtləndirir.

- Siz indiyə qədər də hökumətə çağırışlar etmisiz, nəticəsini gördüyünüz olubmu heç?

- İndiyə qədərki müzakirələrimiz əsasən Konstitusiyanın 146-cı maddəsi və referendumla bağlı olub. Biz hesab edirik ki, bu referendumda hökumət yerli hakimiyyətlərə daha çox səlahiyyət vermək istəyində deyildi. Mənim Bakıda məqsədim ondan ibarət olacaq ki, hökumət mümkün qədər bizim mövqeyimizi qəbul etsin, yerli hakimiyyətlərin üzərinə daha çox məsuliyyət qoysun. Artıq dəyişiklik mərhələsi bitib - Avropa Şurasına üzv olmaqla totalitarizmdən demokratiyaya keçmişik. Bu isə o deməkdir ki, Yerli Özünüidarəyə dair Avropa Xartiyasına hörmət olunmalıdır. Biz hakimiyyətdən demokratiyaya əsaslı şəkildə hörmət gözləyirik. Biz indiki halda demokratiyanı güzəştə gedə bilmərik. Bu, bizim Azərbaycan hakimiyyətinə verdiyimiz güclü bir mesajdır...

- Referendum ərəfəsində siz belə bir fikir səsləndirmişdiz ki, Konqresdə Azərbaycan nümayəndə heyətinin iştirakı dondurula bilər. Bu ehtimalınız qüvvədə qalırmı?

- Əgər proses əvvəlki kimi getsə - yerli hakimiyyətlərə yenə də hörmət olunmasa, bizim narahatlığımıza məhəl qoyulmasa, biz nümayəndə heyətinin iştirakını dondurmaq məcburiyyətində qalacağıq. Hiss edirəm ki, bu məsələ gündəmdə deyil. Amma əlbəttə ki, son qərar mənim səfərim vaxtı hakimiyyətin öz üzərinə götürəcəyi öhdəlikdən asılıdır...

- Bələdiyyə seçkilərinə bir neçə ay qalır. Sizcə, bu seçkiyə qədər nəyisə dəyişmək mümkündürmü?

- Yerli hakimiyyətlərin inkişafı məsələsi vaxtla bağlı deyil. Biz narahatıq ki, hakimiyyət bələdiyyələr haqqında qanuna dəyişiklik deyəndə, Konstitusiya son dəyişikliyi nəzərdə tutur. Biz öz fikrimizdə qalırıq ki, bu, Avropa Xartiyasına ziddir. Məsələnin həlli çox sadədir. Hökumət bir daha təsdiqləməlidir ki, bu Xartiyaya hörmətlə yanaşır və bələdiyyələrə daha çox muxtariyyət vermək istəyir. Bu istiqamətdə dəyişikliklərin hətta seçkiyə qədər ediləcəyini gözləyirik.

- Bakı merinin seçilməsi məsələsi də müzakirə olunacaqmı?

- Bununla bağlı təkidlərimiz davam edir. Hökumət qısa zaman kəsiyində mer seçkiləri ilə bağlı qanunvericiliyə dəyişiklik edə bilər. Belə dəyişiklik göstərər ki, Azərbaycan hökuməti doğrudan da demokratik olmaq arzusundadır, istədiyi adamı mer təyin etmir, xalqa imkan verir ki, öz merini özü seçsin.