Moskvada uzun müddət nağdlaşdırma əməliyyatları ilə məşğul olan və 4 Azərbaycan vətəndaşının daxil olduğu mütəşəkkil cinayətkar qrup yaxalanıb. Hesablamalara görə, qrup iki il ərzində 90 milyard rubl məbləğində vəsaiti ölkədən kənara çıxarıb. “İqtisadi forum” jurnalının “РБК daily” qəzetinə istinadən verdiyi məlumata görə, bu barədə Rusiyanın Daxili İşlər Nazirliyinin İqtisadi Təhlükəsizlik Departamenti açıqlama verib.

Qrupun tutulması əməliyyatı DİN-in İqtisadi Təhlükəsizlik Departamentinin (İTD) əməkdaşları tərəfindən həyata keçirilib. Nəticədə Azərbaycanın 4 vətəndaşı və Rusiyanın “Ticarət-tikinti bankı” ASC-nin 1 əməkdaşı həbs edilib. Bir qədər sonra bank işçisi ölkəni tərk etməmək şərti ilə zaminə buraxılıb.

Qəzetin məlumatına görə, axtarış zamanı Moskvanın 4 kommersiya bankında, o cümlədən fiqurantların yaşayış yeri üzrə 20-dən çox yalançı təşkilatın hüquqi və maliyyə sənədləri, 70-dən çox  “birgünlük” firmanın möhürünün üzü köçürülmüş şəkli, “Bank-Müştəri” sistemi vasitəsilə təşkilatların hesablarının idarə edilməsi açarları olan 9 komputer aşkar edilib. Qanunsuz dövriyyədən 5,3 milyon dollar, 950 min avro və 47,5 milyon rubl müsadirə edilib.

 “Qrup 2008-ci ildən bəri pul vəsaitlərinin xaricə çıxarılması və onların nağdlaşdırılması, konvertasiyası, Azərbaycandan və Birləşmiş Ərəb Əmirliklərindən qaçaqmalçılıqla gətirilməsi üçün qanunsuz kanal yaradıb. Qanuni dövriyyədən çıxarılmış pul vəsaitlərinin həcmi 90 milyard rubl məbləğində qiymətləndirilir”, - deyə DİN-nin departamentindən bildiriblər.

Tədqiqat zamanı müəyyən olunub ki, qrup üzvləri Mərkəzi Bankın lisenziyası olmadan qanunsuz olaraq hüquqi şəxslərin bank hesablarının aparılması, pul vəsaitlərinin inkassasiyası, fiziki və hüquqi şəxslərə kassa xidməti, nağd və nağdsız formada xarici valyutaların alqı-satqısı kimi açıq bank əməliyyatları aparıblar.

Bununla yanaşı, qrup üzvləri uydurma şəxs adı ilə bir sıra kommersiya təşkilatları qeydiyyatdan keçiriblər və Moskvanın müxtəlif banklarında həmin təşkilatların adına hesab açıblar.

Sonra nağdsız pullarının nağdlaşdırmaq istəyən müştərilərin xahişi ilə, o cümlədən xarici valyutaya konvertasiya və onları xaricə çıxartmaq məqsədilə bu pulları saxta hesablardan Kipr və Estoniya banklarında yerləşən digər saxta şirkətlərin hesablarına köçürüblər. Əvəzində müştəriyə qanunsuz olaraq öz faizlərini (0,2%-0,3%) çıxmaq şərti ilə nağd pul ödənilib. Nağd pullar kuryerlər vasitəsilə həftədə bir neçə dəfə olmaqla Azərbaycandan Moskvaya gətirilirmiş.

“Müəyyən olunub ki, kriminal sxemdə Rusiya banklarının və digər kommersiya strukturlarının əməkdaşları iştirak ediblər: pullar xaricdəki şirkətlərə köçürülüb və orada nağdlaşdırılıb, sonra qaçaqmalçılıqla Rusiya ərazisinə gətirilib.” – İTD-dən bildiriblər. İTD-yə görə, saxta şirkətlər Kipr, Litva, Azərbaycan və BƏƏ-də qeydiyyatda keçiblər.