Ölkədə iqtisadi aktivliyin artması və daşınmaz əmlak bazarına nikbin əhval-ruhiyyənin mövcudluğu ehtimalının aşağı olması səbəbindən yaxın bir neçə ayda evlərin qiymətləri düşməkdə davam edəcək. Üstəgəl yay aylarında bir qayda olaraq daşınmaz əmlak bazarında aktivliyin aşağı düşməsi də qiymətləri ucuzlaşdıran amillərdəndir. Bu barədə qiymətləndirici-ekspert Rəşad Əliyev “İqtisadi forum” jurnalına açıqlamasında bildirib.

Ekspertin fikrincə, daşınmaz əmlak bazarında qiymətlərin düşməsinin şərtləndirən səbəblər çoxdur. “Dünya bazarında neftin ucuzlaşması ixracın həcmini və büdcə daxilolmalarını azaltmaqla yanaşı kommersiya şirkətlərində, o cümlədən neft şirkətlərində iş yerlərinin kütləvi ixtisarı və maaşların azaldılması ilə nəticələndi. Bu isə öz növbəsində həm əhalinin alıcılıq qabiliyyətini aşağı saldı, həm də daşınmaz əmlak bazarında aktivliyi kəskin azaltdı. Digər tərəfdən ölkədən kənarda yaşayan, xüsusən də Rusiyada işləyən soydaşlarımızın pul köçürmələrinin azalması, əhaliyə verilən kreditlərin həcminin azalması da bazara mənfi təsir göstərdi.” - deyən ekspert hesab edir ki, böhrandan əvvəl bazarda qiymətlərin qeyri-normal templə artması nəticəsəsində bazarda qiymətlərin korreksiyayası gözlənilən idi. “Qiymətlərin korreksiyasına 2007 (16,7%) və 2008-ci (20,8%) illərdə müşahidə edilən yüksək inflyasiya, ilkin bazarda xərclərin şişməsi, ipoteka proqramının icra olunması və s. mane olurdu.”, - deyə R.Əliyev bildirib.

Ekspertin fikrincə, ilkin və təkrar bazarda evlərin qiyməti pik həddindən bəri orta hesabla 35% aşağı düşüb. “Zonalar üzrə ucuzlaşma qeyri-bərabər olub. Məsələn, ilikn bazarda ən az ucuzlaşma şəhərin mərkəzində və aktiv ərazilərdə müşahidə edilib. Kommersiya təyinatlı daşınmaz əmlaklar təxminən 20-25% aşağı düşüb.” – deyən ekspert kommersiya obyektlərinin yaşayış evlərinə nisbətən az düşməsinin səbəbini birincinin gəlirliyi ilə əlqələndirib. Torpaq bazarına gəlincə, ekspertə görə, göstəricilər fərqli olub. İnvestisiya əhəmiyyətli obyektərin qiyməti yaşayış təyinatlı torpaqlarla müqayisədə çox ucuzlaşıb.

R.Əliyevə görə, daşınmaz əmlak bazarında qiymətlərin bərpası üçün iki şərtin olması vacibdir: ”İqtisadi aktivliyin yaxşılaşması və daşınmaz əmlak bazarına nikbin əhval-ruhiyyənin qayıtması bazarı canlandıra bilər. Ancaq avqust ayının sonuna kimi bu iki amilin baş verməsi ehtimalı çox aşağıdır. Üstəgəl qarşıdan yay fəsli gəlir. Bu fəsildə bir qayda olaraq, daşınmaz əmlak bazarında aktivlik aşağı düşür. Bu baxımdan avqusta qədər qiymətlər az da olsa düşməkdə davam edəcək. Sentyabrda isə bazarda qiymətlərin sabitləşməsini müşahidə etmək olacaq. İqtisadi statistikada ciddi dəyişiklik baş verəcəyi təqdirə bu proqnoza yenidən baxmaq olar.”