May ayında əhali tərəfindən ölkə banklarına yatırılan əmanətlərin ümumi həcmi artsa da, manat üzrə cəlb edilmiş əmanətlərin həcmində azalma müşahidə edilib.Hesabat ayında milli valyuta üzrə əmanətlərin həcmi 8,6 milyon manat azalıb. Bu barədə “İqtisadi forum” jurnalı Mərkəzi Banka istinadən xəbər verir.

Bankın məlumatına görə, 2010-cu ilin iyun ayının 1-i tarixinə əmanətlərin ümumi həcmi 2 milyard 474,7 milyon manat olub. Bu, əvvəlki ayla müqayisədə 0,3%, ötən ilin müvafiq dövrü ilə müqayisədə isə 29,4%% çoxdur. May ayında ölkə banklarına yatırılmış əmanətlərin həcmi 7 milyon manat olub. 2010-cu ilin 5 ayı ərzində əmanətlərin həcmi 146,8 milyon manat artıb.

Əmanətlərin 1,06 milyardı manatla, 1,42 milyardı isə xarici valyutada yatırılıb. Aprel ayı müqayisədə əhali milli valyuta ilə əmanət qoyuluşu 8,6 milyon manat azalıb. Bununla da manatın ümumi əmanətlərdə xüsusi çəkisi aprel ayındakı 43,3%-dən mayda 42,8%-ə düşüb.

Manatın strukturuna diqqət yetirdikdə məlum olur ki, bu azalma tələb olunanadək əmanətlər hesabına baş verib. Belə ki, bir ayda bu növ əmanətlərin həcmi 16,6 milyon manat azalaraq 342,6 milyondan 326 milyon manata düşüb. Halbuki müddətli əmanətlər may ayında 8 milyon manat artıb.

Dünya maliyyə bazarlarına qeyri-sabitliyə baxmayaraq Azərbaycanda əhali xarici valyutaya etibarını hələ də saxlayır. Belə ki, xarici valyuta ilə əmanət qoyuluşunda may ayında artım qeydə alınıb. Artım həm müddətli, həm də müddətsiz əmanətlərdə müşahidə edilib. Hesabat ayında xarici valyuta əmanətləri 1 milyard 404,4 milyondan 1 milyard 420 milyon manata yüksəlib. Xarici valyuta üzrə müddətli əmanətlərin həcmi 5 milyon, müddətsiz əmanətlərin həcmi isə 10,6 milyon manat artıb.