2010-cu ilin 1-ci yarısında Neft Fondunun valyuta məzənnələrinin dəyişməsindən yaranmış büdcədənkənar xərcləri  artaraq 869,1 milyon manata çatıb. Təkcə ötən rübdə xərclərin həcmi əvvəlki rüblə müqayisədə 2 dəfədən çox artıb. Halbuki ötən ilin sonunda Fond məzənnə dəyişməsindən 97,6 milyon manat həcmində gəlir əldə edib.

“İqtisadi forum” jurnalının Dövlət Neft Fonduna istinadən verdiyi məlumata görə, ötən rüb valyuta məzənnələrinin dəyişməsi səbəbindən Fondun büdcədənkənar xərcləri  869,1 milyon manat təşkil edib. Bu əvvəlki rüblə müqayisədə 490,1 milyon manat çoxdur. I rübdə xərclər 379 milyon manata bərabər olub. 

Dünya bazarlarında avronun ucuzlaşması öz təsirinin Neft Fondunun vəsaitlərinə də göstərir. Əgər 2009-cu ildə məzənnə dəyişməsindən yaranmış gəlirlər artım tendensiyası nümayiş etdirirdisə 2010-cu ildən başlayaraq artıq azalma müşahidə edilir. Cari ilin əvvəlinə Fondun məzənnə dəyişməsindən gəliri 97,6 milyon manat olduğu halda iyunun sonuna 869,1 milyon manatlı xərclə əvəz olunub.

Fondun açıqlamasına görə, 2010-cu ilin yanvar-iyun ayları ərzində büdcə gəlirləri 6,1 milyard manat, büdcə xərcləri isə 2,6 milyard manat olub.

Fond neft və qaz sazişlərinin həyata 6,09 milyard manat, BTC layihəsi üzrə dividendlərdən 83,2 milyon manat, tranzit gəlirlərdən 4,3 milyon manat, xarici sərmayəçilər tərəfindən təhvil verilmiş aktivlərdən 0,9 milyon manat, akrhesabı ödənişlərdən 0,8 milyon manat  qazanıb.

Ötən 6 ay ərzində Neft Fondunun vəsaitlərinin idarə olunmasından əldə olunan gəlir 11,9 milyon manata bərabər olub.

İlin birinci yarısında dövlət büdcəsinə 2,455 milyard manat vəsait transfer edilib. Qaçqın və məcburi köçkün ailələrinin sosial-məişət vəziyyətinin yaxşılaşdırılmasına 34,0 milyon manat, Samur-Abşeron suvarma sisteminin yenidən qurulmasına 74,8 milyon manat, Oğuz-Qəbələ zonasından Bakı şəhərinə su kəmərinin çəkilişinə 53 milyon manat vəsait ayrılıb.

"2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı"nın maliyyələşdirilməsinə Neft Fondundan 2,8 milyon manat vəsait ayrılıb. 1,5 milyon manat "Bakı-Tbilisi-Qars yeni dəmir yolu" layihəsinin maliyyələşdirilməsinə yönəldilib.

2010-cu ilin ilk 6 ayı ərzində Neft Fondunun idarə edilməsi ilə bağlı xərcləri 9,1 milyon manat olub.

2010-cu il iyulun 1-ə Fondun aktivləri ilin əvvəlinə (14,9 milyard ABŞ dolları) nisbətən 21,6 % artaraq 18,12 milyard ABŞ dollarına bərabər olub.