“İqtisadi forum” jurnalının Maliyyə Nazirliyinə istinadən verdiyi məlumata görə, Nazirlər Kabineti 2012-ci il dövlət büdcəsi layihəsinin, ölkənin iqtisadi və sosial inkişaf konsepsiyasının və proqnoz göstəricilərinin hazırlanması barədə sərəncam qəbul edib.

Sərəncama əsasən, Maliyyə Nazirliyi 2012-ci il və sonrakı üç il üçün dövlət büdcəsinin və icmal büdcənin layihələrinin müəyyən olunmuş müddətdə hazırlanmasını təmin etmək məqsədi ilə Nazirlər Kabinetinin müvafiq sərəncamı ilə yaradılacaq gəlirlər və xərclər üzrə komissiyaların tərkibinə dair təkliflərini 1 ay müddətində Nazirlər Kabinetinə təqdim etməlidir.

Sərəncama görə, Dövlət Statistika Komitəsi 2010-cu ilin ilkin statistik məlumatlarını fevralın 5-dək İqtisadi İnkişaf və Maliyyə nazirliklərinə təqdim etməlidir.
Vergilər Nazirliyi və Dövlət Gömrük Komitəsi və dövlət büdcəsinin gəlirlərini təmin edən digər orqanlar təkliflərini martın 1-dək Nazirlər Kabinetinə, iyulun 1-dək Maliyyə Nazirliyinə təqdim etməlidir. 

Maliyyə Nazirliyi öz növbəsində 2012-ci və sonrakı üç il üçün dövlət və icmal büdcələrinin proqnozunun göstəricilərini aprelin 10-dək, dövlət büdcəsində dövlət investisiya xərclərinin ilkin həcmini martın 31-dək İqtisadi İnkişaf Nazirliyinə təqdim etməlidir. İqtisadi İnkişaf Nazirliyi 2011-ci il üçün dəqiqləşdirilmiş, 2012-ci il və sonrakı üç il üçün ölkənin iqtisadi və sosial inkişaf konsepsiyasının və proqnoz göstəricilərinin ilkin variantını martın 1-dək, dəqiqləşdirilmiş variantını isə avqustun 1-dək Maliyyə Nazirliyinə təqdim etməlidir.

Naxçıvan Muxtar Respublikasının Nazirlər Kabinetinə, nazirliklərin, komitələrin, idarə və təşkilatların rəhbərlərinə, şəhər və rayon icra hakimiyyəti orqanlarına tapşırılsın və bələdiyyələrə tövsiyə edilir ki, İqtisadi İnkişaf Nazirliyinin təlimat məktubuna uyğun olaraq, lazım olan materialları iqtisadiyyatın müvafiq sahələrinin inkişafının təhlili əsasında növbəti büdcə ili və gələn üç il üçün ölkənin iqtisadi və sosial inkişaf konsepsiyasını, proqnoz göstəricilərini və toplu maliyyə balansını hazırlamaq üçün iyulun 15-dək İqtisadi İnkişaf Nazirliyinə təqdim etsinlər.

Nazirliklər, komitələr və büdcədən maliyyələşən digər təşkilatlar aşağıdakıları yerinə yetirməlidirlər:

- növbəti büdcə ili və sonrakı üç il üçün büdcə layihələrini və büdcə prosesinin təkmilləşdirilməsinə dair təkliflərini iyulun 1-dək Maliyyə Nazirliyinə təqdim etməli;

- dövlət büdcəsi vəsaitinin səmərəli istifadəsini təmin etmək məqsədi ilə funksional təsnifatın müvafiq bölmələri çərçivəsində inzibati təsnifata uyğun olaraq boş (vakant) ştatlar barədə məlumatları hər rübdən sonrakı ayın 15-dək Maliyyə Nazirliyinə təqdim etməlidirlər.

Dövlət Sosial Müdafiə Fondu və Dövlət Neft Fondu növbəti büdcə ili və gələn üç il üçün öz büdcə layihələrinin ilkin variantını martın 15-dək, dəqiqləşdirilmiş variantını isə iyulun 1-dək İqtisadi İnkişaf Nazirliyinə və Maliyyə Nazirliyinə təqdim etməlidirlər.

Nəqliyyat Nazirliyi Maliyyə Nazirliyi ilə razılaşdırmaqla "Avtomobil Yolları" Məqsədli Büdcə Fondunun, Maliyyə Nazirliyi "Dövlət zəmanəti ilə alınan borcların Təminat Fondu"nun növbəti büdcə ili və gələn üç il üçün büdcə layihələrinin ilkin variantını martın 15-dək, dəqiqləşdirilmiş variantını isə iyulun 1-dək İqtisadi İnkişaf Nazirliyinə təqdim etməlidirlər.

Sərəncamda dövlət büdcəsindən maliyyə yardımı almaq istəyən bələdiyyələr müvafiq sənədləri sənədləri və məlumatları mayın 1-dək Maliyyə Nazirliyinə təqdim etmələri tövsiyə olunur.